بيت مسلم صحيح

بيت مُسلم صحيح " يعني المفروض انك بتصلي الخمس فروض في وقتهم عشان تكوني قدوة لأولادك ، بتقرأي قُرآن ومحافظة على وردك ، بتسمعي دروس وبتتعلمي أحكام دينك

بيت مُسلم صحيح يعني بتتحكمي في غضبك ومش من أقل حاجة تدعي على أطفالك ، تسعي انك تعلمي ولادك الصلاة من صُغرهم من 7 سنين وتعاقبيهم على ترك الصلاة من أول سن عشر سنين

الطفل عموما مبيحبش نظام الأوامر فى كل حاجة و بيبقى عنه نوع من التمرد وبيقلب بعناد شديد
فـ الأفضل إن بدل ما نقول قوم صلي .. هنمثل اننا مش بناخد بالنا من الأذان ونطلب منه يقومنا للصلاة لما يسمعه
ده هيخليه طول اليوم منتبه جدا ومنتظر كل أذان وكمان من هنا بيتعلم تحمل المسؤولية

ولما يكبر شوية نقوله إن احنا نفسنا نصلي سوا جماعة عشان أجرها اكبر ب ٢٧ درجة وإن احنا عاوزين بيت أكبر في الجنة وكده ، والأب المفروض ياخده معاه المسجد

لازم كمان تعلمي الإبن انه يشارك فى أعمال البيت وميتعودش ان الأم والأخت هما الخدامين والباقى أسياد ! لازم تحببيه في التعاون

لازم يتعلم الحنية و ده هيجي من معاملة الزوجين لبعض و من معاملتهم للطفل نفسه

عقابك لأولادك كالتالي :

متضربيش على الوجه ، متقبحيش طفلك وتذكري العيوب اللي فيه وتقللي منه حتى لو بينك وبينه أو قدام أي حد
العقاب يكون الهجر لحد ما يصلح الغلط اللي عمله

واياكِ تعاملي الصلاة كإن هي وسيلة العقاب
يعني ميكونش عامل غلط فتقولي ليه انت صليت ! قوم صلي يلا " بنبرة صوت تهديد وعقاب "
عاملي ولادك باللطف واللين وصاحبيهم
علاقتك بأولادك بلاش تكون أكل وشرب بس

متحكيش أسرار بيتك لحد مهما جوزك عمل ، مش لازم كل ما تروحي عند صاحبتك تحكي ليها جوزي عمل وعمل ،ولا لازم تحكي لوالدتك كل حاجة
متدخليش على جروبات الماميز وتحكي أسرار بيتك وتقولي للبنات انا ولا هو الغلطان ؟! لان في الشرع هتكوني انتي الغلطانة لان ربنا أمر بإن أسرار البيوت متتحكاش
دي أسرار بيتك انتِ ... جوهرة حافظي عليها وحافظي على زوجك إن محدش يُذكر إسمه بسوء

مش فرض عليكِ اه انك تخدمي والدة زوجك لإن الإسلام مفرضش دا ، بس من أخلاقك ومن الإحسان " مُساعدتها " وباب الإحسان دا عليه أجر كبير أوي عند ربنا
ومتعليش صوتك عليها ولا تبجحي فيها ..وعامليها ك والدتك فعلًا لإن دا هيتردلك من زوجة إبنك

- امشي بمبدأ على الحلوة والمُرة معاك ..
يعني لو جوزك ربنا رزقه كده بمبلغ حلو فـ الحمدلله
ولو مفيش في جيبة غير خمسة جنية فـ الحمدلله
متقلليش من رزقه ، ومتطلبيش فوق طاقته ، ومتحملهوش ضغط بيت وضغط شغل وضغط تربية العيال ويبقى طول الوقت شكاوي

طول الوقت حسسي زوجك إنه مش حارمك من حاجة وإن هو أعظم نعم ربنا عليكي وإن حتى لو مفيش غير لقمة عيش واحدة في بيتك فهي بالدنيا كلها عشان من رزقه وتعبه
واختاري الوقت الصح لما تحبي تطلبي حاجة منه

- متشغليش مسلسلات ولا أغاني قدام أطفالك ولا تسمحي لحد انه يشغل دا قدامهم .. بلاش تزرعي جواهم ان دا العادي
لا هو مش العادي دا ( الحرام ) اللي بنجاهد ان احنا نبطل نعمله
وربيهم من صُغرهم على الحلال والحرام واياكِ تبدأي التربية بالعيب وانه ميعملش كده عشان الناس

خليه يحب ربنا أوي ودا هيكون نتيجة كلامك عن ربنا طول الوقت
حبيبي ربنا شايفك ،حبيبي ربنا مستنيك وبينادي عليك اهو يلا روح صلي واحكي ليه نفسك في ايه
متعليش صوتك على أختك عشان مالكش غيرها وربنا بيحب الطفل الهادي

طول الوقت قول ليه ربنا بيحبك
واقعدي احكي ليهم قصص الأنبياء واسمعوها مع بعض
واحفظوا قُرآن مع بعض

علمية العقيدة مُنذ الصغر حتى لو مش فاهم ، بس التكرار هيخلي عنده حُب استطلاع وهيتعلم الدين والعقيدة

إسراء عاطف