نبذة مختصرة عن المرضى النفسيين

بيقول..

كنت بتريق ساعات علي مراتي لما بتقولي "أنا خايفه أنام في الشقه لوحدي" وكان ردي عليها "خفي دلع"
أطنش كلامها في الفون وهيا بتشكيلي من أهلي ، مقعدش معاها في البيت كتير حتي لو ماليش مزاج أخرج ، مشكرش في حاجه بتعملها لتشوف نفسها

قبل الجواز صاحب ليا قالي "هتفضل تهادي ودادي وتحن وتلين مع مراتك هتطلع فوق راسك وتدلدل رجليها ، طنشها ومتاخدلهاش رأي ، قول حاضر وكبر"

والأهم من دا كله إني مقولهاش أسراري ، كنت بخبي عليها حاجات كتير ، وكانت بتعرف من برا صدفه ، وذي ما أمي قالتلي "مراتك لو كسرتلك كلمه تبقي معرفتش تحكمها" ، أو مبقتش راجل في نظرها
عشان كدا مبخلهاش تناقشني في اي موضوع

في مثل بيقول "الراجل مبيعبهوش غير جيبه" ، وانا بأكلها وبصرف عليها ومش مخليها عايزه حاجه ، بجبلها لبس بأستمرار ، مش عارف ليه دايما بتعاني مني ؟! مع اني موفرلها كل حاجتها الماديه
دا حتي ابوها لما بشكيله منها بيقولي "بنتي بتدلع ، سيبك من كلامها ، انت الراجل"

لما نكون قاعدين مع العيله ، ماينفعش تتكلم ، لأنها مابتفهمش في حاجه ولا عارفه الدنيا ماشيه ازاي ، وفي مثل بيقول "الراجل اللي بيمشي ورا رأي ست يبقي لمؤاخذه" ، لأنهم مابيصرفوش بعلقهم وعاطفيتهم وخداهم حبتين
دا حتي في حديث بيقول "ناقصات عقل ودين"

وذي ما قالوا زمان "أكسر للبنت ضلع يطلعلها عشره" ، عشان كدا كنت واقفلها علي الغلطه ، كل غلطه بتمنها ، اومال هنجيب عيال ازاي ونربيهم ويطلعوا اسوياء نفسيآ
أنزلها تخدم أمي غصب ، وتخدم أخواتي الشباب اللي اصغر مني غصب بردو ، اومال انا جايبها ليه ودافع فيها دم قلبي ، بنت الاصول تستحمل ، والست الصح ترضي جوزها وتسمع كلامه

ساعات بحس أن ملهاش حق تتعب ذينا أو تشتكي من التعب ، دي زوجه ، في مثل بيقول "الست الشاطره بتبان من نضافه بيتها ونفسها" ، عشان كدا ضربتها مره وهيا تعبانه أو كانت بتتحجج بالتعب ، ازاي ادخل وألاقي الدنيا مكركبه والهانم نايمه !!

لا وبعد دا كله ، طلبت الطلاق ، عايزه بيتها يتخرب والناس تمسك في سيرتنا ، دا في حديث بيقول فيما معناه "لو كنت أمرآ أحدآ أن يسجد لغير الله ، لأمرت المرأة أن تسجد لزوجها"

بس هنقول إيه ، بنات الأصول بقوا قليلين ، طب والله صاحبي كان معاه حق ، أنا مكنش ينفع أهادي وأدادي

"نبذه مختصره عن المرضي النفسيين"
ربنا يعافينا منهم ياااارب