طلاب الازهر

الازهر بيدخل طب من 95%
ده امتحانات الازهر نص كم وهايفة
دا اللى العام الحكومي بيقولوه على الازهرية
احب اقولكم حاجه بسيطه عن الازهر
طالب الأزهر ده مختفي عن الاضواء تمامًا عايزين يلغوا وجوده ويعدموا دور الازهر فى بناء طالب جمع بين العلم والدين
.........................................................
طالب من اول ما دخل ابتدائي وهو كل يوم الصبح صوته يتنبح من قراءة القرءان الكريم بصوت عالي .. ويا سلام لو في الشتا مكانش حافظ ..
عينك ما تشوف الا النور وهو بياخد كام عصاية على ايده ف عز التلج وبينفخ فيها عشان ما توجعهوش
ده غير يوم امتحان القراءن بتاعه محدش في الدنيا بيحس بيه الا ازهري زيه
طالب دخل أولى اعدادي لا بيه ولا عليه .. فرحان انه بقى ف اعدادي
وتيجي الصدمة لما ييجي يستلم الكتب
ويلاقي نفسه شايل ما لا يقل عن 14 كتاب مثلا .. فيهم كتب لا تقل عن 200 صفحة ... ويروح يشكي ويصوت ويقول #انا_همتحن_ف_كل_ده_ازاي
طالب معندوش مادة اسمها عربي ولا دين
عنده العربي اسمه ( صرف .. نحو .. ادب .. مطالعة ونصوص .. بلاغة )
عنده الدين اسـمه (فقه .. ميراث .. عقيدة(توحيد) .. حديث .. تفسير .. قرآن كريم .. سيرة .. تجويد .. علوم حديث .. علوم قرآن)
طالب ف ثانوي معندوش حاجة اسمها علمي علوم ولا علمي رياضة
بياخد مواد الاتنين ..
طالب بيمتحن في القرآن الكريم شفوي وتحريري نص الامتحان من منهج السنة والنص التاني من السنين اللي فاتت .
طالب بيمتحن في القرآن كله ف تالتة ثانوي
طالب كان من سنتين ف 6 ابتدائي و 3 اعدادي معندهوش حاجة اسمها ترم
كله ع بعضه ف اخر السنة
وعلى فكرة .. طالب الازهر بياخد كل المواد الثقافية
لو كان ف علمي
رياضيات .. كيمياء .. فيزياء .. احياء .. انجليزي ..
او ادبي
تاريخ .. جغرافيا .. علم نفس .. فلسفة .. فرنسي ..الخ
ومش هكلمكم عن مادة اسمها العروض ( اسألو عليه طلبة أدبي ف ثانوي ازهر )
طالب مجاميع الكليات عنده زي التربية والتعليم ويمكن اعلى
ومهما كانت كليته بيدرس معاها مواد شرعية وبيطالب بحفظ خمس اجزاء من القران الكريم لو كان كلية علمية .. او بالقرءان الكريم كله لو كان كلية نظرية..
طالب الازهر .. طالب راجل
طالبة الازهر .. طالبة جبارة عشان بتستحمل الغربة علشان تدخل الكلية اللى نفسها فيها ومش موجوده فى محافظتها وكمان التنسيق بتاعها بيبقى اعلى من تنسيق الاولاد بتاع 3 .. 4 .. % .
وييجي واحد يقولك بيدخلوا طب من 50% لأنه جاهل ومش عارف حاجه، ،،،وواحد تانى يقولك بيدخلوا كليات بمجموع قليل لأنه برضو جاهل ومش مقدر مستوى المواد ولا محتواها ولا عارف انه لو جه مكانك مش هينجح اصلا ولا يوصل لمرحلة الجامعة.
واحد تانى يقولك دول حفظه مبيفهموش ،،،وهو يعينى غلبان مش فاهم انه لو مفيش فهم هيبقى الحفظ مستحيل .
طالما ماجربتوش الازهر ومابتحسوش بطالب الازهر يبقا مترغوش في اللي ماتعرفهوش
ربنا معاكم يا#ازهرية